الــــشــــاعــــــــــر

الــــشــــاعــــــــــرالسبت 29 يناير 2011, 11:11 pm

الأبيض ضميرك

إنت يا الأبيض ضميرك
صافي زي قلب الربيع
في كلامك وابتسامك
أندي من زهر الربيع
عشت متهيئ لحبك
كل أيامي وحنانها
ابتسامك عزيزة
بحرق الآهات عشانا
بس لقيتك إنت حائر
تظلم الحب بالمهانة
الدموع السايلة مني
يا ما سالت حرقتني
والظنون الحارقة قلبي
بالماسي كم شقتني
كنت بجني شقاك محنة
وأعشق أوهامي الطوتني

رد: الــــشــــاعــــــــــرالسبت 29 يناير 2011, 11:14 pm

أمرك ياقدر

مشي امرك ياقدر انت احكامك مطاعه
لوحصل نحن افترقنا والليالي الهم اضاعا
همسة الذكرى المعاي تبقى زاد روحي ومتاعا
ــــــــــــــــــــــــــــــــــــــــــــــــــ ـــــــ
الزمن كان مبتسم والليالي جميله حالمه
كانت الايام بتمضي حلوه ريانه ومسالمه
لا اشتكينا من الزمن لا لا التقينا في لحظه ظالمه
بي حنانا الدنيا كانت ياحبيب العمر عالمه
ــــــــــــــــــــــــــــــــــــــــــــــــــ ـــــــ
فجأه من غير نحن نشعر يافراق طليت علينا
واصبحت كل الليالي الطيبه والايام حزينه
وارتيم ظل في جبين ايامنا ظل آهات سجينه
كان طريق مكتوب نسيرو نحن سرناهو ومشينا
ــــــــــــــــــــــــــــــــــــــــــــــــــ ـــــــ
عدت من بعدك رجعت عشت متغرب وحيد
وابتديت اشعر بزهر العمر يتساقط بعيد
ياحليلك انت والايام ربيع اخضر سعيد
كنت ببكي عليك بعمري والدموع بس ما بتفيد

رد: الــــشــــاعــــــــــرالسبت 29 يناير 2011, 11:14 pm

حبيت عشانك كسلا

............................
ظلم الزمان الخاني يا ريتو لو كان خـانك
ليه جرت واتنكرتي ليه لي الساب ديارو عشانك
قدر عشانك كسلا
حبيت عشانك كسلا وخليت دياري عشانها
واخترت ارض التاكا الشـاربه من ريحانها
كلمني قوليها فاكر ليالي القاش
لمن الحنين عاودني بعطفك الجـياش
جفيت حبيب ما خانك من نور بسيمتك عاش
انا تاني ما بتلقاني يوم في طريقك مــاش
قاصد مكان في كسلا
حبيت عشانك كسلا وخليت دياري عشانها
واخترت ارض التاكا الشـاربه من ريحانها
صوت السواقي الحاني ذكرني ماضي بعيد
وعلى الرمال آثارك طرتني ليلة عيد
المني قلبك ينسا يرفس غلاوة الريد
باقي الطريق بمشـيهو خليني فيهو وحيد
والحب عذاب في كسلا
حبيت عشانك كسلا وخليت دياري عشانها
واخترت ارض التاكا الشاربه من ريحانها
فرحـت ليالي الريد نداوة البسمات
خلتني أبكى
حبيت عشانك كسلا وخليت دياري عشانها
واخترت ارض التاكا الشاربه من ريحانها

رد: الــــشــــاعــــــــــرالسبت 29 يناير 2011, 11:15 pm

إنت مافي

اي حاجة بتبقى مافي
الشمس تلقاها مافي
والبحر من غير مرافي
والمدن بتكون منافي
والحبيب يبقى جافي
العسل ما ببقى صافي
وانت مافي

انت مافي الروح تفارق
ويبقى موج النيل مفارق
الشروق ينسى المشارق
والنسيم لي الروض يشاهق
والصباح ما ببقى شارق
وانت مافي

انت مافي منو البسالم
ويبقى من الامو سالم
الزمن يصبح مظالم
والحنين يبقى ظالم
وتمسح الأحزان عوالم
تفتح الاحزان عوالم
وانت مافي

انت مافي الناس تغيب
والحبيب ينسى الحبيب
الدمع يصبح قريب
والطبيب ما ببقى طيب
كيف يكون في الدنيا طيب
وانت مافي

رد: الــــشــــاعــــــــــرالسبت 29 يناير 2011, 11:18 pm

قصيدة الكروان

لـيه يا كروان خليت عشك

بـاريت الـغربة الـبتغشك

فـارقـت الـبلد الـبتريدك

بـالصندل كـانت بـترشك

لـيه يا كروان سبت ديارك

ومـشيت خـليتهم سـمارك

دي الـغربة الـحتت نوارك

مـا تـسيبها تـقلل مقدارك

دا الـبعد الحاصل كان منك

ليه نرمي اللوم على اقدارك

لـيه يا كروان خليت ناسك

ومـشيت لـلناس الماناسك

انـت المعروف بين جلاسك

مـعروف بي رقة احساسك

ليه تنسى عيون النيل والليل

والـريد الـحابس انـفاسك

لـيه يـا كروان بعدك طول

ومـا عـاد تغريدك زي أول

انـا عارفو حنينك ما تحول

عـشق الأوطـان ما بتاول

اصلو الانسان ما بكون انسان

لـو بنسى قديم زمنو الاول

رد: الــــشــــاعــــــــــرالسبت 29 يناير 2011, 11:21 pm

أصلو ما ممكن

ممكن وللا ما ممكن
أسيبك اصلو ما ممكن
اسيبك كيف بعد ريدك
صبح من روحي متمكن
**************
ممكن تختفي الأبراج
ويبقى النيل بدون أمواج
يغيب الكوكب الوهاج
وتبقى الزهرة من غير تاج
عارف شوقي ما بهدن
واسيبك أصلو ما ممكن
**************

ممكن يرحلوا النيلين
ويمشوا يهاجروا مغتربين
وممكن يجرح الياسمين
والزيتون يجافي التين
إلا الأصلو ما ممكن
نعيش انا وانت مفترقين
ممكن أي حاجة تكون
وحرف النون يكون ما نون
وممكن تاني يظهر لون
يضيع لون دهب شيبون
إلا الأصلو ما ممكن
غلاوتك عندي مرة تهون

رد: الــــشــــاعــــــــــرالسبت 29 يناير 2011, 11:23 pm

شال النوار

ياريت من أول

وريتنا إنك يكمن***تتأخر يوم

كان غائب***أطمنّا شويه

وبحرك ياليل***ماشفنا نجوم

بيقولوا الغائب***عذرو معاه

في غيابك ياما***نشيل اللوم

العيد الجاب الناس****لينا ما جابك

يعني نسيتنا خلاص

مع إنك إنت الخليتنا

نغني الحب***ذكري وإخلاص

رد: الــــشــــاعــــــــــرالسبت 29 يناير 2011, 11:25 pm

أعـز الناس

يا أعز الناس حبايبك نحن ...
زدنا قليل حنان ...
العمر زادت غلاوة معاك ...
صالحني الزمان ...
يا أحن الناس حنانك ...
كنت من قبلك بشيل الليل دموع ...
وأطويه هم ...
أنا كنت بخشي علي الأماني الطفلة ...
يفنيها العدم ...
وجيت لقيتك بين ضلوعي شموع ...
وغنيتك نغم يا نغم ...
يا حبيب ورد الأماني الحلوة في أعماقي فتح ...
وأبتده القلب العاش العمر ...
في آهاته يفرح ...
والزمن ما أظن بعدك إنتِ ...
يرجع تاني يجرح ...

رد: الــــشــــاعــــــــــرالسبت 29 يناير 2011, 11:29 pm

أقابلك

أقابلك في زمن ماشي
وزمن جاي و زمن لسه
اشوف الماضي فيك باكر
اريت باكر يكون هسه

***
و قصر طول مشاويرنا
ورقش بالفرح جلسة
على النيل والقمر
مرات يبين في الموج ويدسه
ونحن نقابلو
زي طفلين كلامم كلو بالهمسة
وزي عصفورة قلبها دابو
حنة وبالولف حسّ

***
اي عيون بتتقابل
الا عنيك ما بتتفات
في عنيك بتوه
كيفن حلاوة البسمة في القاسيات
وعطر الصندل المستني
يفرح بيك فرحتو جات
وحاتك خلي منو شوية
عشان يتكاحلن منو السمحات

***
بلاك النجمة لا بتتعلا
لا بتتدلاّ فوقه هلال
عليك الريده طلي علينا
يالختينا فيك آمال
تجينا فرح ترفرفي فوقنا
نستناك بالموال
والشوق بيني وبينك انتي
زي ما تقول مطر اهطال

رد: الــــشــــاعــــــــــرالسبت 29 يناير 2011, 11:32 pm

الشــمس

صدق أمس

شفت الشمس

بضوى فى حفلة عرس

وطبعا ده اصلو المستحيل

تطلع شمس والدنيا ليل

لكن وحات وطنى الجميل

والخضره والظل الظليل

شفت الشمس بعيونى ديل

فى الحفلة بتغنى وتشيل

شفنا العريس قام قوًمها

حلف عليها وخصمها

بس رقصة واحدة تقدمها

واتدللت متبسمه

قامت عزيزه مكرمه

وبى خطوه حالمه منغمه

الخطوه جات متقسمه

خلت قلوبنا مقسمه

دى هديه جاتنا من السما

وحفلتنا بيها .. بنختمها

رد: الــــشــــاعــــــــــرالسبت 29 يناير 2011, 11:33 pm

المشكله

الروح تروح ما مشكلة ..

تزيد جروحى علي جروح ما مشكلة ..

ينسى الفراش عطر الربيع ما مشكلة ..

ينسى الوديع صوت الوديع ما مشكلة ..

الشاري لو فكر يبيع لو ضاعت الاعمار تضيع ما مشكلة ..

لاتبين شمس لايهل قمر ما مشكلة ..

يبقى السحاب من غير مطر ما مشكلة ..

يرموني في نص البحر تجيبو لي الناس خبر ما مشكلة ..

لو هز صمت الليل برق ما مشكلة ..

والقاش رحل خلا الشرق ما مشكلة ..

لو عمري بالشوق يحترق لو رحت ما جبت الفرق ما مشكلة ..

الدنيا تبقى بدون جليس ما مشكلة ..

تبقى الليالي بدون ونيس ما مشكلة ..

وتنسى ليلى حبيبا قيس ما مشكلة ..

وتنسى العروس اسم العريس ما مشكلة ..

المشكلة

ريدتك بقت هى المشكلة

ادينى حل للمشكلة ..!

رد: الــــشــــاعــــــــــرالسبت 29 يناير 2011, 11:34 pm

غربه وشوق

جيناكم يا حبايبنا
بعد غربه وشوق
نغالب فيهو
ويغالبنا
نكتم آهه وتظهر
آهه وتتعبنا
حنين لى شوفة
الغاليين مذوبنا

سماع أهلاً من الاحباب
شروق آمال
ووصف البهجة بالكلمات
محال يتقال
حلاوة العوده
غنيناها فى موال
بتحكى عن الولف
واصلو الولف كتال

هناك غربتنا ما هنتنا
يا حلوين
هناك الهم بدل
واحد يبين همين
ومهما قلوبنا تتأوه
ونتأوه سنين وسنين
مصيرو الحى يلاقى
حبايبو لو صادقين

رد: الــــشــــاعــــــــــرالسبت 29 يناير 2011, 11:35 pm

عصافير الخريف

هـجرة عـصافير الـخريف
فـى مـوسم الـشوق الحلو
هـيج رحـيلا مـع الـغروب
احـساس غـلبنى اتـحملو
وكتمت اشواق الحنـيـن
داير الدموع يتـقـلـو
ورجعـت خليت الـدموع
يـنسابو ..مـنى ويـنزلو
ليـه يا عصافيـر الخريف
خضرة مـشاعـرى اشيلا صيف

تـحت الـغمام شـايف
مـواكب الـهجرة اتـلاشت سراع
ليه يـا عـصافير ليه الاسف
مين علمك أسف الوداع
وعارف دا ما اول سفر
لبلاد بـعيدة بـدون مـتاع
زى ما بتخافي مـن الرياح
بنخاف كمان انحن الضياع
ليه يا عصافير ليه الضنى
صفقة جناحك احزنها

غـايـب الـسنين الـليله
مالو غنا العصافير غـلبو
طراهو زولا كان ولوف
كم رضا خاطرو وطيبو
سمع قليبو كـلام حـنين
هـدهد مـشاعرو ودوبـو
الـناس سعيدم فى الـحياة
لا ضاق فراق لا جربو
وانا حالى فى بعد الوطن
دفـعنى ضي العين ثمن

منتديات سودانية إسلاميه إجتماعيه ثقافيه تعليميه

الــــشــــاعــــــــــر

descriptionالــــشــــاعــــــــــرالسبت 29 يناير 2011, 11:11 pm

descriptionرد: الــــشــــاعــــــــــرالسبت 29 يناير 2011, 11:14 pm

descriptionرد: الــــشــــاعــــــــــرالسبت 29 يناير 2011, 11:14 pm

descriptionرد: الــــشــــاعــــــــــرالسبت 29 يناير 2011, 11:15 pm

descriptionرد: الــــشــــاعــــــــــرالسبت 29 يناير 2011, 11:18 pm

descriptionرد: الــــشــــاعــــــــــرالسبت 29 يناير 2011, 11:21 pm

descriptionرد: الــــشــــاعــــــــــرالسبت 29 يناير 2011, 11:23 pm

descriptionرد: الــــشــــاعــــــــــرالسبت 29 يناير 2011, 11:25 pm

descriptionرد: الــــشــــاعــــــــــرالسبت 29 يناير 2011, 11:29 pm

descriptionرد: الــــشــــاعــــــــــرالسبت 29 يناير 2011, 11:32 pm

descriptionرد: الــــشــــاعــــــــــرالسبت 29 يناير 2011, 11:33 pm

descriptionرد: الــــشــــاعــــــــــرالسبت 29 يناير 2011, 11:34 pm

descriptionرد: الــــشــــاعــــــــــرالسبت 29 يناير 2011, 11:35 pm