منتديات المسيكتاب
السلام عليكم ورحمة الله تعالى وبركاته
مرحبا عضونا الكريم نتحرق شوقا لعودتك... وإن كنت زائرا نتشرف بزيارتك ونطمع في إنضمامك لعائلتنا ...
منتديات المسيكتاب
السلام عليكم ورحمة الله تعالى وبركاته
مرحبا عضونا الكريم نتحرق شوقا لعودتك... وإن كنت زائرا نتشرف بزيارتك ونطمع في إنضمامك لعائلتنا ...
منتديات المسيكتاب
هل تريد التفاعل مع هذه المساهمة؟ كل ما عليك هو إنشاء حساب جديد ببضع خطوات أو تسجيل الدخول للمتابعة.

منتديات المسيكتاب

منتديات سودانية إسلاميه إجتماعيه ثقافيه تعليميه
 
الرئيسيةالأحداثالمنشوراتمكتبة الصورالتسجيلدخول
كل عام وانتم بخير
بمناسبة مرور عشرة سنوات على إنشاء المنتدى تم تفعيل الرسائل المميزة بالمنتديات الرئيسية نتمنى لكم امتع الاوقات في طى صفحاتنا .. والاعلانات التجارية مجانا... ودمتم

 

 خيمـــــــة عكــــير

اذهب الى الأسفل 
كاتب الموضوعرسالة
هيثم عبدالسيد ابوماجد
عضومميز
عضومميز
هيثم عبدالسيد ابوماجد

عدد الرسائل : 318
العمر : 48
تاريخ التسجيل : 22/01/2009

خيمـــــــة عكــــير Empty
مُساهمةموضوع: خيمـــــــة عكــــير   خيمـــــــة عكــــير Icon_minitimeالسبت 19 يونيو 2010, 8:45 pm




 


MUSDAR مسدار عكير الدامر

الشاعر عكير الدامر هو علي إبراهيم عاكير والده من البجا، وأمه من الجعليين بالدامر، وارتبط اسمه بالدامر، ككثيرين غيره من البجا، مثل آل أبوهاجة، وهو من أوائل خريجي مدرسة غردون لذا تجده يجيد الإنجليزية، وبالطبع البجاوية ، والعربية، هناك قصة طريفة تحكى عنه :
كان يجلس يوماً في سوق الدامر في بوتيك لأحد أقربائه الشباب، فدخلن مجموعة من الفتيات وسخرن من الشاعر وصديقه البجاوي (يعني قطعن فوقو مع الشاب بتاع البوتيك) وكانت لغة الحوار بينهم الإنجليزية، ولم يعرفن أن الشاعر عكير يفهمها، فعندما انتهى حديثهن رد عليهن بالإنجليزية ، ووبخهن بأن العلم إذا أتخذ للسخرية من الناس لا فائدة منه، وهو كما تعلمون حكيم ووقور جداً، وهنا لم يفهم صديقه البجاوي شيئاً، فالتفت إليه ووضح له كل ما دار ... لكن باللغة اللبجاوية ... ولم يفهمن شيئاً ..
اشتهر بشعر الحكم، المدح، وصف الطبيعة، وقليل من شعر الغزل ...
أفضل من يتحدث عنه هو عمنا رحمة محمد رحمة بالدامر فهو صديقه ورفيق دربه... وقد شارك بجهد مقدر في إخراج ديوانه، ويحفظ كثيراً من شعره النادر

خبر الشوم طلع هز القبب واترجت
والنار في الدارويش البترجمو وجت
امواج المحبين بالشوارع قجت
وربات الخدور نزعت حجابها وعجت
------
عكير الدامر يصور مشهد نبأ رحيل الشيخ الجيلي الكباشي

***********************

ما بنقبل حكم ناس في بلاد الغربة
وتحت التاج نقع جمل انكسر في هربة
بدل الزل وعيشة العار وحالة الكربة
أولى الآخرة" ميت ما بخاف التربة"

*****************
فيك طبع الأسد صالحت او حاربت
وفيك طبع البرامكة بعدت او قربت
فيك طبع الملوك شرقت او غربت
وفيك طبع الحكيم لقمان حلل او ربطة

*********************************
يا مولاي أه من غلبي
من النارو حرقت قلبي

يا مولاي بشكيلك شقاي و غلبي
حظي الديمة من ريدة الأنيس جافلبي
طالت السفرة و إتحفت مناسم?? تلبي
هب الريد تلبي و عاودك الحنين يا قلبي


مالك نفسي مطعونة تملي تنيني
مالك عيني لي الغميد أبيتي تليني
عطشان ديما طفح الموية ما برويني
كاتلاني الطريفية البريدا غريني

الناس عيدت مرقت علي أصحابا
و أنا فريت علي الجاهلة السمح ترحابا
فاطرًا يحكي براق البدودي سحابة
دي لفت قلبي زي لف طرحتا اللافحابا



يتمني الدهب لو لونو يشبه لونك
إشتهت الدرر لو هي تبقي سنونك
مجنون ليلي حالتو أقل من مجنونك
ما دام ليلي كانت في المحاسن دونك


عصباً عني فارقت الضريح لي ربي
كل ما هب نسام منو زاد في جمري
جرحي القرب يبري الداير يبدر عمري
بدرو ليّ تغريد بلبلك يا قُمري

أخضر ليهو ضل فوقو المحاسن شرن
و أفلج فاطرو زي برق السواري الكرن
يتقسم مقاطع في المشي و يتحرن
زي فرخ القطا الأماتو ركن و فرن


عمي الهادي نشاب البريدا ضربني
قسم نومي من تيبان حيايا سلبني
حاكم الصافي أبي يقبل سؤالي صدمني
صبري الكان جميل جربتو و كلو غلبني

عن من أحب أنا غير خاطري فرقت
هايم بي غرام عن حالتي كنت سُرقت
لولا أدمعي ،م ناري كنت حرقت
و لو ما ناري من كترت دموعي غرقت
***********************************************
ختت أيدها فوق إيدي انجذبت خِدرت
حبيت أمشي من كُتر الطرب ما قدرت
بقت الحنة بين إيدي وأيديها اندرت
لولا الحنة بيني وبينها كنت ودرت

شعرك منتظم زي السلاسل فتلو
وعينيك ترقِص الحجر ان بقت شافتلو
الطاؤوسة قاصدة مشيكي ما عرفتلو
وأعصاب الرآك أتكهربت تلفتلو

ممشوق القوام الماوجدتا مثيلو
جفاهو معاى ولا محنة غيرو
جافانى العزيز الكنتا ديمه نصيرو
هو يسوى الغلط وانا اسوي كتر خيرو
*******************************************
قصيدة عكير الدامر في وصف الدنيا
----------
سرورك ما بتم عاقباهو ديمة الفجعة
وظاهرك لينا سكر الا طعمك وجعة
كم طفشتي مرتاح وقلبو مابي الهجعة
روحو تشابي وانت قطعت خط الرجعه
.....
تقابلك عروس تعشق معاني رقيصه
تملاك بالمحبة وتمشي نازله نقيصه
ما يغريك دلاله وتوب جمال بلقيسه
عاين للقبور وبعدين سماحته بتقيسه
...
بتقابلك جنينة تمتعك بي ثماره
وترقد في امانا وتنهمك بعمارا
باكر تبقى ليك حنضل تشوفو دمارا
تسحب منك .... وتدق مسماره
...
زولاً شاف رقاد العبروهو مشبر
والزول البرص فى الطوب ووشو مغبر
إتأكد دة بكرة مصير غير إتكبر
إنسى الموت والمال والبنون إتبتر
...
دى الغدارة دى الحقارة دى العقارة
كم قلبت زغاريد عرسه بي نقارة
أعلِنا بالحرب قبال تشب الغارة
وقبل الروح تغرغر وتبقى في الغرغارة
...
إتغشينا بي حبك لبسنا عباية
يا موية الرهاب الما ملت كباية
عجيب يا دنيا أمرك الا نحنا غباية
عاشقين الجمال في لمعة الحرباية
**********************************************
عــكــيــر الــدامـــر فى مدح الشيخ الجعلي


حباب الكوكب ال لي كل شر حباس
حباب السره من ناس همزه والعباس
طريق ديمه المنيل ونادي خاتي يباس
قباب نور الزمان البق من كدباس

يافرع الطهاره الصافي من ادناس
بعيد قلبك من الوسواس والخناس
جبل الرحمة يا مشرع جميع الناس
تعيش قبلة صلاح لي كافة الاجناس

البنا ما بقيف يا سيدي من غير ساس
ياسر حاج حمد بركه وندى واحساس
صوطك لي المرض من العضم حساس
يخرج بي عجل ذي طلقة الرصاص
__________________________
احياك الله لي الاسلام ركن حراس
عرق دم الرشيد سيد العلم ميراث
تعالج بي النظر لا محايه لا كراس
وبي موية الوضوء بتطرد جنون الراس

حبتك السعاد اهل العقول النايره
بي جنحات صقور جاتك مخويه طايره
والد المعتصم يالجعلي سيد الدائره
احياك الله يا درع القواسي الغايره
______________________________

خصاك الله بي التقوى النظيفه الصافيه
بالحياة طلوع ثم الصداقه الوافيه
يد ذو الفقار لي كل شر متلافية
فلتحيا وتعيش وعليك تاج العافيه
*****
كم وفقت ناسا طولت متعاديه
كم ارشدت عالم في الحضر والبادية
سفينة نوح صحبتك في الامان متهايه
نعم البها فاز وحياته صبحت ناديه
*********
رايتك في المنام واخذت جلسه وهانيه
واليوم الله جاد بي شوفتي ليك التانيه
لكل كتاب والدنيا اصلها فانيه
نعم الجالسك لو كان دقيقه وثانيه
**********
اشكر خالي مجذوب لي هون قاسيه
صدق لي الرؤيه ثبتت راسيه
يا نسل النبي الضو الليالي الماسيه
اقبلها من عكير الجاب ليك متواسيه
_____________________________

غاب نجم الاهل بقت العداوة اقــــــارب
البتجيبُ فزعه يكون دبيب وعقـــــارب
البتقول صباح الخير تلق بكره مغـــارب
دبرة صُرة وجعَه جُوه حربة غــــــارب

**********
يبس شجر المحنة وراحت الاهـــــــــليه
ود اختك نصيحتي تقاطع بالكــــــــــليه
ود العم نصيبه وبي المرض ممــــــــليه
والعجب ان قبيل عدمان ولِق مالــــــيه

**********
الجنى في المحاكم شفنا خاصم ابــــــوه
والحق الجلي الشياب قبل بابــــــــــــوه
الشبان بقوا البيصلي ما بحبـــــــــــــوه
والدين المحمدي اصبحوا يسبــــــــــوه

**********
الصبي قاطع الوالدين ولم حبــــــــــاله
والاخو بي البترمي اخوه مشغول باله
الخال انسحب ود الاخت سبــــــــــاله
والعم ود اخوه يدُور نسب يا بــــــاله

**********
الجار قاطع الجار والحيط عــــــــلوها
وان قلت النصيحه الفي الكتاب قتلوها
الاخوان على بعض السيوف سلـــوها
واموال اليتيم اهل السبح اكــــــــــلوها

**********
ما يتقدم ال لي عله ديمه عطــــــــــاه
والبهتك عرض مكشوف تملى غطاه
البزرع له شوك لابد يتوطــــــــــــــاه
والبطبخ له سم لابد يتعاطـــــــــــــــاه

الرجوع الى أعلى الصفحة اذهب الى الأسفل
هيثم عبدالسيد ابوماجد
عضومميز
عضومميز
هيثم عبدالسيد ابوماجد

عدد الرسائل : 318
العمر : 48
تاريخ التسجيل : 22/01/2009

خيمـــــــة عكــــير Empty
مُساهمةموضوع: رد: خيمـــــــة عكــــير   خيمـــــــة عكــــير Icon_minitimeالأربعاء 24 أكتوبر 2012, 8:26 pm

ياجريعة العسل البتشرقى لى رشافك
اعميتى البصر يالسمحه بى كشافـــك
ربك تبرك كيتن على من شافـــــــــــك
حرقتينا يالجاهله الترق شافــــــــــــــك
الرجوع الى أعلى الصفحة اذهب الى الأسفل
الأمل الرحل
وسام التميز الاول
وسام التميز الاول
الأمل الرحل

عدد الرسائل : 1351
العمر : 30
تاريخ التسجيل : 13/03/2010

خيمـــــــة عكــــير Empty
مُساهمةموضوع: رد: خيمـــــــة عكــــير   خيمـــــــة عكــــير Icon_minitimeالسبت 27 أكتوبر 2012, 4:45 am

flower

_________________

[ندعوك للتسجيل في المنتدى أو التعريف بنفسك لمعاينة هذه الصورة]





كن أسـدا تــأكل الـثـعـالــب من بـقـايـاك *** و لا تكن ثـعـلـبـاً يــأكل من بـقـايــا الأسـد


اللهم إنا نسألك العفو والعافيه والمعافاه في الدنيا والآخــره
الرجوع الى أعلى الصفحة اذهب الى الأسفل
https://sites.google.com/site/osamakhaan/
 
خيمـــــــة عكــــير
الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات المسيكتاب :: المنتديات الفنيه :: واحـــــة الشعر والدوبــيت-
انتقل الى: