الزواج الجماعى

فكرة الزواج الجماعى هل يمكن تنفيذها عندنا فى المسيكتاب !
لو عرض عليك الموضوع هل تقبل به ام ترفض وفى حاله الرفض ما السبب !

مشكور اخي العزيز المغازي على هذا الموضوع المهم . في نظري لايمكن .اما الموضع الثانى انا بعرضوا عليك اول وريني رايك شنو.

والله ياعزيزى انا كطرف اول موافق عليهو لكن المشكله الطرف الاخر .

سلامات والله يا مغازي أنا معاك بس الطرف الاخر نشوف رايو ونختار تاني
وكلامك صااااح

مشكور الاخ شلاقه لكن تختار تانى كيف الاختيار الاول مالو

لا قصدي إنو نشوف راي الطرف الثاتي شنو الزواج بتكون من طرفين واللا شنو
وتاني الزوج بقوم يحدد

يا جماعة نكون واضحين وما نرمي الكورة في ميدان الطرف التاني في الحقيقة لا نحن ولاهم بقبلو ا الزواج الجماعي ليه لأن مجتمعنا في المسيكتاب لا يقبل هذا الامر بل يعتقده البعض عملا غير مقبول واظن ان الرفض ناتج من الانفة العالية التي يتصف بها إنسان المسيكتاب لدرجة تجعله يعتقد ان إقامة مثل هذه المناسبات الجماعية فيه إزلال للنفس متمثل في الدعم الذي في الغالب يقدم للازواج كمساعدة لهم وتحفيز لغيرهم من بعض المسئولين في الحكومة وحتي لا يسمع العريس كلمات مثل عرسو ليهو / وهو عندو شنو / وكان ماعندو حق الشنطة المعرسلها شنو / وبعد العرس خليهم اللعيشوهو / و..........و..............و........... بقوم يرفض رفض قاطع مثل هذه الاشياء حتى رسخت هذه المفاهيم في عقولنا واصبحت جذء من موروثنا الثقافي .

شكرا اخى الصحاف كلامك ده كلو صاح
لكن الموضوع ده لو الناس اتناقشت فيه بجديه بحيث انو الموضوع يكون محصور فى نطاق القريه بدون تدخل المسئوليين الناس دى لو اتكاتفت ما محتاجه منهم شىء ده كلو لو الشباب مقتنعين بالفكرة لكن لو اخدنا الموضوع ونظرنا ليه بناءا على كلامك صعب انو يتحقق
لكـــــــــــــــــــــــــن ما وريتنا رايك الشخصى انت.  

في حاجة مهمة يا جماعة نحن اي زول لمن يجي يعرس بكون عندو ضيوف كمية وناس دايرين يجاملوه شخصيا , الحتة دي ما واضحة في الزواج الجماعي يعني ممكن العقد بس يكون جماعي وتاني اي زول يعمل مناسبتو في الوقت البريحو , طيب شن الفايدة خاصة بعد كلامك يا المغازي إنو يكون محصور بدون تدخل مسئولين !! اما إذا قلنا نعمل مناسبة واحدة كبيرة للعرسان كلهم فحا تدخل مشكلة الضيوف اصحاب الخصوصية مثلا جاك ضيف من بروسودان زميل دراسة يعني غير العريس ما بعرف زول معقول نخليهو قاعد في الزحمة واللخمة دي ممكن تقول لي كلها ساعتين الناس تتلم فيهم لكن برضو ما منطقي إنو انا اكون معزوم في مناسبة بتاعة عرس اجي و افتش للعريس ما القاهو وبتدخل كمان مشاكل تانية في الحتة دي مثلا مكان المناسبة وتكلفتها ومشاكل توزيع الاكل وما تنسو إننا مجتمع مترابط عندنا أعراف كتيرة مثلا هاك يا ولد ودي الصينية دي لي ناس فلان (فلان) دة بكون زول كبير في السن ومن الاهل والاقارب دة بحصل في مناسبة واحدة وبتحصل فيهو بعض المناقشات زي ليه ماوديتو لي فلان , خليك من مناسبة تكون لامة الحلة كلها دي الحايحصل فيها شنو الله اعلم , العرس الجماعي البنسمع بيهو عادة بكون عقد بس بحضرو مسئول في الحكومة بكون اصلا مقدم ليهم الدعم ودة الهدف المطلوب اصلا وبعد كدة اي زول بعمل عرسو بي طريقتو او ممكن ماتعمل علي كيفك وطالما حكاية إنو يجي مسئول في الحكومة ويقدم دعم لأقامة زواج جماعي مرفوضة ومشنفة في المسيكتاب فإمكانية إقامة زواج جماعي في المسيكتاب من المستحيلات ....

اولا مشكور على المداخله وسعيد برايك
لكن القصد من الزواج الجماعى هو تقليل التكلفه على الزول المسكين الما قادر يعرس لكن الزول المستطيع وعاوز يعمل دعوه على كيفو وما فى داعى مدخلو مع ناس الزواج الجماعى لانو الموضوع اذا انت اصلا ما مقتنع بيهو ما فى داعى تدخل نفسك فى حاجات زى دى
والضيوف ديل زاتهم افتكر بجو العرس الجماعى ومتخيلين وعارفين شكل المناسبه وبرنامجها لانو الفكرة دى اتنفذت فى كتير من المناطق شوف ناس غرب شندى ديل جعليين وقلوبهم حارة وبكرموا الضيف لكن اقتنعوا بالفكرة وعملوا عرسهم و
(عى الطلاق) عدموا الصبى والفتاة البايرة شفت الشغل ده كيف
اما موضوع انو يكون محصور فى نطاق القريه وعدم تدخل المسئوليين ده ردى على كلام الصحاف لانو قال انو الموضوع فيه ازلال للنفس قلنا ما مشكله ناس المسيكتاب ما شاء الله بخيرهم وقادرين يتكفلوا بى موضوع زى ده.

المغازى كتب:

القصد من الزواج الجماعى هو تقليل التكلفه على الزول المسكين الما قادر يعرس لكن الزول المستطيع وعاوز يعمل دعوه على كيفو
.

سالتني عن راي الشخصي انا تحديدا برفض ازوج في زواج جماعي ليييه ؟
لأن مفهوم الناس العام وانت من ضمنهم إنو اي زول بعرس في زواج جماعي هو زول مسكين وفقران وعدمان !!!!!
المفهوم دة إذا ما إتغير ما حا تنجح فكرة الزواج الجماعي في المسيكتاب

][ندعوك للتسجيل في المنتدى أو التعريف بنفسك لمعاينة هذا الرابط]

ياجماعه التسجيل عن منو
الزواج ياهو الزواج كان غني ولا كان فقران
وأبركهن أقلهن مهراً
ختوا أيدكم في بعض وكل خمسه أصحاب يتفقوا مع بعض
ويعملوا عشاء او غدا في النادي او الجامع او اي مكان سنتر
والحله كلها تجي تأكل وتنبسط
ويكون الخمسه اصحاب عرسوا بي تكلفة عريس واحد
أها قلتوا شنوا نسجل معاكم
وله العرس ده لي الشفع الصغار
هههههههههههههههههههههههههه
لكم تحياتي وسلامي
أكان غالبكم العرس نحن بنعرس تاني بدلكم
ســــــــــــــــــــــلام مربع ياشباب

مشكور يالمسيكتابى
انت عارف بنوت الزمن ده عينن فيكم وكمان عملن فيكم غنا عديل يعنى شحده وليهن حق للشايفاتنو من الشباب الكسلان ده
وماعندك مشكله التسجيل عندى وسرك فى بئر وماتسمعك ام العيال .