بعد نحو ألفي عام من الآن، أي عندما نلج الألفية الخامسة، تكون أشياء كثيرة قد تغيرت جذرياً، وستختلف حياتنا مما هو عليه، ومما سيشمله التطور ما نسميه الآن بـ (الموبايل)، ندعوكم لنبحر في المستحيل ونسرج أحصنة الخيال ونغوص في عمق التصور، لنرى كيف سيكون الموبايل بعد ألفي عام.
(1)
في العام أربعة ألف وأربعمائة وستة أنتجت شركة (الموبايل العجيب) ذلك الموبايل الذي لا يكتفي بالمهام العادية والروتينية للموبايل العادي، بل يتخطاها إلى أعمال لا يمكن تصديقها بسهولة ما لم تجربه بنفسك، أولاً صنعت له يدين ورجلين..!! و(بالعربي كده إيدين وكريعات صُغار) .. وهذه - طبعاً - تساعد في حالة أتتك مكالمة، وبدلاً عن النغمة الصوتية المألوفة ، سيطل عليك الموبايل من جيبك وقد يقول بضيق:
- (صاحبك أمجد ده إتصل عليك، ترد عليهو وللا نمشيهو، وللا أقول ليهو الزول ده ما في أضرب ليهو بعدين؟!).
أما إذا كان الموبايل بعيداً عن يديك، ففي هذه الحالة (بجيك ماشي عديل) وتوقع أن يخاطبك بغضب:
- ( يا خي ناسك ديل كرهونا بالمسكولات دي!!).
(2)
وبدلاً عن المنبه الذي تضبطه لإيقاظك في الصباح، (الموبايل العجيب) هذا يستطيع أن يوقظك بطريقة مبتكرة، مثلاً أن يحركك أو (يجرك من رجليك) وقد (يطقطق) بعدها أصابعه كما يفعل الكمساري بالضبط ويقول لك وهو (ينهزك):
- (أصحي يا شيخنا الشمس طلعت) !!.
وفي حالة عدم استيقاظك بسهولة يمكنك برمجته أن (يكشح فيك جك موية باردة)!!
(3)
يمكنك أن تأخذ وتعطي معه في الكلام – مثلاً- إذا سألته:
- ( الساعة كم؟).
لا تستبعد أن يجيبك قائلاً:
- ( الساعة عشرة)!!
ثم يضيف بحيرة :
- ( مالك طالع مشوار وللا شنو؟).
وأنت بدورك ستحسمه بقولك:
- ( دي حاجة ما بتخصك .. خليك في شغلك).
(4)
هذا (الموبايل العجيب) يمكنه أن يركّب نفسه في الشاحن (براهو) إذا شعر أن بطاريته توشك على النفاد، وفي هذه اللحظة إذا ناديته يمكن أن يقول لك بكل هدوء:
- أنا هسع جاري الشحن ... ما بجيك.
علاوة على ذلك يمكنه أن يكون مفيداً جداً في (المراسيل) القريبة، ممكن (ترسلو يجيب موية باردة من الثلاجة)..! يفتح التلفزيون، (يجيب المصلاية، يورنش ليك الجزمة، يرجع كبابي الشاي .. إلخ.)..!!
(5)
بالنسبة لربات المنازل يستطيع أن يساعدهم في الكثير، يمكنه تقطيع البصل و(توريق الخدرة)، فالأيادي والأرجل هذه ليست عبثاً، بل ويمكن أن تمتد خدماته لأكثر من ذلك، مثل أن تعلمه ست البيت الطبيخ و(العواسة) وأن يحرك البصلة ويفرك البامية، ملحوظة: (بالمناسبة، الخدمات الأخيرة هذه لا يقوم بها الموبايل الضكر) .. نواصل .. الشركة صانعة الموبايل جعلت للأيادي والأرجل خاصية التأقلم حسب المهمة وهذه تساعد (الموبايل العجيب) في ملء باقات المياه وإدخالها الثلاجة، وطبعاً يمكنه أن ينتظر بتاع اللبن، وقد يصل إلى مرحلة تغير البامبرز!!
(6)
الموبايل العجيب يمكنك أن تشاوره في مواضيع عديدة، وسأنقل لك جانباً من حوار بين (سامي) وموبايله العجيب.
سأل (سامي) موبايله عن رأيه في عادات وتقاليد الزواج في السودان، وهنا خلف الموبايل رجله، وألقي بالجريدة التي كانت بيده جانباً ورد عليه بحماس:
- أنا عن رايي شايف إنو فطور العريس ده ما في ليهو أي داعي؟!
- أها .. وتاني!؟
- بعدين عندك حفلة الزفاف دي حقو يخلو الموبايلات بس تغني لأنو فنانين الأيام ديل غناهم جوطة ساي!
- ورايك شنو في تسهيل الزواج للشباب؟
- في الحتة دي أنا عندي رأى، أولاً الشيلة تكون واحد واحد، أو نلغيها عديل خليها تشيل شيلتا براها؟
- كلام عجيب، أها .. وبعدو؟
- من الحاجات المكلفة لمراسم الزواج (العزومة)، من المفترض تكتب في كرت الدعوة إنو المعازيم ديل يجونا جاهزين..!!
- إنت موبايل مسطول وللا شنو؟!
- وبعدين حركات أم العروس البتعملا مع العريس دي حقو تخليها، ياخي دي بتدفعو ليك كترت قروش.!
- كمان جابت ليها فصاحة موبايلات .. أنا شايف أحسن أقفلك، إنت بقيت تقول كلام خارم بارم.!!
وهنا قام الموبايل وقفز جارياً نحو الباب وهو يصيح:
- تقفلني ليه، أنا عملت ليك شنو؟ كلامي ده كلو صاح.
أمسك سامي بسفنجته وأطاح بها نحو الموبايل الذي تفاداها بمهارة وهنا إضطر سامي أن يتناول الريموت كنترول الخاص بـ (الموبايل العجيب) ويقفله من على البعد وهو يهتف بحدة :
- ده شنو الموبايل البراي ده...!!!.
_________________
اللهم صلي علي سيدنا محمد وآله وسلم. اللهم اجعلنا خير خلف لخير سلف واجمعنا بنبيك (ص) في اعلي الجنان.
(1)
في العام أربعة ألف وأربعمائة وستة أنتجت شركة (الموبايل العجيب) ذلك الموبايل الذي لا يكتفي بالمهام العادية والروتينية للموبايل العادي، بل يتخطاها إلى أعمال لا يمكن تصديقها بسهولة ما لم تجربه بنفسك، أولاً صنعت له يدين ورجلين..!! و(بالعربي كده إيدين وكريعات صُغار) .. وهذه - طبعاً - تساعد في حالة أتتك مكالمة، وبدلاً عن النغمة الصوتية المألوفة ، سيطل عليك الموبايل من جيبك وقد يقول بضيق:
- (صاحبك أمجد ده إتصل عليك، ترد عليهو وللا نمشيهو، وللا أقول ليهو الزول ده ما في أضرب ليهو بعدين؟!).
أما إذا كان الموبايل بعيداً عن يديك، ففي هذه الحالة (بجيك ماشي عديل) وتوقع أن يخاطبك بغضب:
- ( يا خي ناسك ديل كرهونا بالمسكولات دي!!).
(2)
وبدلاً عن المنبه الذي تضبطه لإيقاظك في الصباح، (الموبايل العجيب) هذا يستطيع أن يوقظك بطريقة مبتكرة، مثلاً أن يحركك أو (يجرك من رجليك) وقد (يطقطق) بعدها أصابعه كما يفعل الكمساري بالضبط ويقول لك وهو (ينهزك):
- (أصحي يا شيخنا الشمس طلعت) !!.
وفي حالة عدم استيقاظك بسهولة يمكنك برمجته أن (يكشح فيك جك موية باردة)!!
(3)
يمكنك أن تأخذ وتعطي معه في الكلام – مثلاً- إذا سألته:
- ( الساعة كم؟).
لا تستبعد أن يجيبك قائلاً:
- ( الساعة عشرة)!!
ثم يضيف بحيرة :
- ( مالك طالع مشوار وللا شنو؟).
وأنت بدورك ستحسمه بقولك:
- ( دي حاجة ما بتخصك .. خليك في شغلك).
(4)
هذا (الموبايل العجيب) يمكنه أن يركّب نفسه في الشاحن (براهو) إذا شعر أن بطاريته توشك على النفاد، وفي هذه اللحظة إذا ناديته يمكن أن يقول لك بكل هدوء:
- أنا هسع جاري الشحن ... ما بجيك.
علاوة على ذلك يمكنه أن يكون مفيداً جداً في (المراسيل) القريبة، ممكن (ترسلو يجيب موية باردة من الثلاجة)..! يفتح التلفزيون، (يجيب المصلاية، يورنش ليك الجزمة، يرجع كبابي الشاي .. إلخ.)..!!
(5)
بالنسبة لربات المنازل يستطيع أن يساعدهم في الكثير، يمكنه تقطيع البصل و(توريق الخدرة)، فالأيادي والأرجل هذه ليست عبثاً، بل ويمكن أن تمتد خدماته لأكثر من ذلك، مثل أن تعلمه ست البيت الطبيخ و(العواسة) وأن يحرك البصلة ويفرك البامية، ملحوظة: (بالمناسبة، الخدمات الأخيرة هذه لا يقوم بها الموبايل الضكر) .. نواصل .. الشركة صانعة الموبايل جعلت للأيادي والأرجل خاصية التأقلم حسب المهمة وهذه تساعد (الموبايل العجيب) في ملء باقات المياه وإدخالها الثلاجة، وطبعاً يمكنه أن ينتظر بتاع اللبن، وقد يصل إلى مرحلة تغير البامبرز!!
(6)
الموبايل العجيب يمكنك أن تشاوره في مواضيع عديدة، وسأنقل لك جانباً من حوار بين (سامي) وموبايله العجيب.
سأل (سامي) موبايله عن رأيه في عادات وتقاليد الزواج في السودان، وهنا خلف الموبايل رجله، وألقي بالجريدة التي كانت بيده جانباً ورد عليه بحماس:
- أنا عن رايي شايف إنو فطور العريس ده ما في ليهو أي داعي؟!
- أها .. وتاني!؟
- بعدين عندك حفلة الزفاف دي حقو يخلو الموبايلات بس تغني لأنو فنانين الأيام ديل غناهم جوطة ساي!
- ورايك شنو في تسهيل الزواج للشباب؟
- في الحتة دي أنا عندي رأى، أولاً الشيلة تكون واحد واحد، أو نلغيها عديل خليها تشيل شيلتا براها؟
- كلام عجيب، أها .. وبعدو؟
- من الحاجات المكلفة لمراسم الزواج (العزومة)، من المفترض تكتب في كرت الدعوة إنو المعازيم ديل يجونا جاهزين..!!
- إنت موبايل مسطول وللا شنو؟!
- وبعدين حركات أم العروس البتعملا مع العريس دي حقو تخليها، ياخي دي بتدفعو ليك كترت قروش.!
- كمان جابت ليها فصاحة موبايلات .. أنا شايف أحسن أقفلك، إنت بقيت تقول كلام خارم بارم.!!
وهنا قام الموبايل وقفز جارياً نحو الباب وهو يصيح:
- تقفلني ليه، أنا عملت ليك شنو؟ كلامي ده كلو صاح.
أمسك سامي بسفنجته وأطاح بها نحو الموبايل الذي تفاداها بمهارة وهنا إضطر سامي أن يتناول الريموت كنترول الخاص بـ (الموبايل العجيب) ويقفله من على البعد وهو يهتف بحدة :
- ده شنو الموبايل البراي ده...!!!.
_________________
اللهم صلي علي سيدنا محمد وآله وسلم. اللهم اجعلنا خير خلف لخير سلف واجمعنا بنبيك (ص) في اعلي الجنان.